દલિત સૂર્ય

વીંધી દરિયા સાત ભારતની ભૂમિ પર

લાવ્યો નવપ્રભાત ભારતની ભૂમિ પર

 

શમણે ઉગતો સૂર્ય દુઃખના ડુંગર ટોચે

પ્રગટ્યો તે સાક્ષાત ભારતની ભૂમિ પર

રોતી કીકી એક બીજીમાં અંગારા

દીથી પીડિત જમાત ભારતની ભૂમિ પર

બાળી મનુપુરાણ જડમાં ફૂંક્યા ચેતન

કોપે દ્રોણ જમાત ભારતની ભૂમિ પર

પાણીનો અધિકાર લગાડ્યો દવ ચવદારે

ઉકળી નદીઓ સાત ભારતની ભૂમિ પર

માગ્યો મતાધિકાર દલિતો કાજ અનોખો

જાણે હિમપ્રપાત ભારતની ભૂમિ પર

ગાંધીનો હઠયોગ, ઉપવાસીની હિંસા

સમજણને આઘાત  ભારતની ભૂમિ પર

મૂક્યો ‘સમતા’ શબ્દ તરતો બંધારણમાં

ઉગાર્યા દલિત પછાત ભારતની ભૂમિ પર

મુક્તિનો સંદેશ સૌને બુદ્ધ શરણથી

ટાળ્યો ઉલ્કાપાત ભારતની ભૂમિ પર