લોકો

 

હતો એક તેના થયા ચાર લોકો

અને એમ તૂટ્યા લગાતાર લોકો

 

નથી તો સમજતા કદી વાત સીધી

અને તોય પાછા સમજદાર લોકો

 

નથી જે સવાલો જ ઉત્તરને લાયક

 અને  તોય પૂછે ફરીવાર લોકો

 

રિવાજો ન  તૂટ્યા,ભલે રાહ છૂટ્યા

દિશાહીન ચાલ્યા ઘણીવાર લોકો

 

કથા અંધકારો કરે, સાંભળે તે

કરે સૂર્યને પણ નમસ્કાર લોકો

 

રહી જાય છે તે બધા પોથીઓમાં

નથી જાણતા  જે અધિકાર લોકો

 

વધે સ્વાદ જ્યારે ભળે દૂધ સાકર

નથી એમ ભળતા અહીં યાર લોકો