કોને માટે આ આઝાદી ?

કોને માટે આ આઝાદી ? કોને માટે?

મળ્યા પછી જે ધનવાનોની વધી ગઈ આબાદી

ને મહેનતકશ ઈન્સાનોનું ભાગ્ય બની બરબાદી

કોને માટે આ આઝાદી ? કોને માટે?

ચોર ગયા પરદેશી, દેશી ચોર અહીં જાગ્યા

મળી ગયા હક લૂંટતણા એ સૌને વણમાગ્યા

અને ગરીબોના લમણે તો રોજ હથોડા વાગ્યા

કોને માટે આ આઝાદી ? કોને માટે?

સુખની નદીઓ ઠલવાઈ તો ઊંચી મહેલાતોમાં

ડૂસકે ચડતી ઝૂંપડીઓ સૌ અંધારી રાતોમાં

બહેલાવે શૈશવને મમતા જ્યાં વાતોમાં

કોને માટે આ આઝાદી ? કોને માટે?

સુખની શેરી ઉજ્જડ ભાસે ભર દહાડે અંધારી

બેકારી છે, ભૂખમરો ને આંખોમાં લાચારી

મરી ગયા છે ચહેરાઓ ને મરી ગઈ ખુમારી

કોને માટે આ આઝાદી ? કોને માટે?

લાંચમાં લોટે અમલદાર , જ્યાં લૂંટમાં લીન વેપારી

હપ્તાની બેડીમાં પોલીસ, ખુશ આલમ અંધારી

નેતા પર કટકીનાં કામણ સ્તબ્ધ છે દુનિયાદારી

કોને માટે આ આઝાદી ? કોને માટે?

આઝાદીના અમૃત રસમાં તારી રહ્યો આ સેવક

સૌના સુખને પોતે અંકે કરી રહ્યો આ સેવક

કોને માટે આ આઝાદી ? કોને માટે?

ભડકે બળતા આવાસો, ચોધાર રડે છે રાતો

દલિતના આંસુઓ સાથે નથી કોઈને નાતો

સૂરજ તેનો ઊગે જે તેના રક્તથી રાતો

કોને માટે આ આઝાદી ? કોને માટે?

કટકી લાંચ નિસાસા શોષી તમે બનાવ્યો મેવો

સમજાવો કે દેશપ્રેમનો મહિમા છે આ કેવો?

જવાબ આપો સત્તા પર આરૂઢ થયેલા દેવો

કોને માટે આ આઝાદી ? કોને માટે?