ક્રાંતિનો શબ્દ

 

લાશમાં જીવન ભરે તે શબ્દ ક્રાંતિનો જ હોય

ધર્મસત્તા જ્યાં ડરે તે શબ્દ ક્રાંતિનો જ હોય

 

આંખ તો છે પણ નથી જોઈ શક્યા જે સત્યને

દિવ્ય દ્રષ્ટિ ત્યાં ધરે, તે શબ્દ ક્રાંતિનો જ હોય

 

ધોમધખતા તાપમાં પણ મૂરઝાતો જે  નથી

અગ્નિકુંડે ઉછરે, તે શબ્દ ક્રાંતિનો જ હોય

 

અંધકારોએ રચેલી ભીંતમાં ભીંસાય સૌ

સૂર્ય ત્યાં પેદા કરે, તે  શબ્દ ક્રાંતિનો જ હોય

 

ન્યાયનો રસ્તો વિકટ પણ તોય ચાલે  કાફલા

હોય જે ત્યાં મોખરે , તે શબ્દ ક્રાંતિનો જ હોય

 

ભેદભાવોનાં કપટને મૂળથી ઉખેડવા

છેક ઊંડે ઉતરે,  તે શબ્દ ક્રાંતિનો જ હોય

 

બુદ્ધ  ફૂલે  મંડેલા   આંબેડકર ગાંધી બની

મુક્ત કરવા અવતરે , તે શબ્દ ક્રાંતિનો જ હોય

 

દીર્ઘ  કારાવાસમાં પણ તે જ રાખે છે અડગ

જીતતો કાળાન્તરે, તે શબ્દ ક્રાંતિનો જ હોય

 

છેક પાતાળે જ દાટે ક્રૂર સત્તાધીશ પણ

વ્રુક્ષ રૂપે  પાંગરે , તે શબ્દ ક્રાંતિનો જ હોય