ચૂપકીદી

તું બોલતો નથી.

તારા વતી કોણ બોલે?

અહીં તો જૂજ એવા

જે બીજા વતી બોલે.

તું નથી  બોલતો એટલે

એમ જ લાગે છે

જાણે તું અહીં રહેતો જ નથી.

પંખી ટહુકો કરીને ,

સિંહ  ત્રાડ પાડીને,

પર્વત  પડઘો પાડીને ,

પોતાના અસ્તિત્વનું એલાન કરે જ છે.

તું તો એવું પણ નથી કરતો.

તું નથી બોલતો પણ.

તારી અંદર ઊંડે

ચાલે છે ઉથલપાથલ મોટી

 તારો ચહેરો જ કહી આપે છે

પણ તું કશું બોલતો નથી એટલે

કશું જ બહાર આવતું નથી.,

ચુપકીદી કાંઈ  જ બહાર આવવા દેતી નથી.

 

કોને ફૂરસદ છે

તારી અંદર ઊંડે ઉતરીને,

તારી ભીતરનો ચિતાર મેળવી આપે ?

તું બોલીશ તો ભૂકંપ નથી આવી જવાનો.

નહીં બોલે તો જ ભૂકંપ આવશે

તારી ભીતર

જે તોડી નાખશે તને

વિખેરી નાખશે તને.

પછી તું બોલે તે નક્કામું.

તું બોલે તે જ સારૂં છે

તારે માટે...