માન કે ના માન

 

 

શબ્દના આકાશમાં પેલા સિતારા જેમ છું

માન કે ના માન, ઉંચો હું ય તારા જેમ છું

 

સૂર્ય મારી ઝંખનાએ કંઇક પેટાવ્યા અહીં

આજ તો ઉજાસના ખુલ્લા પટારા જેમ છું

 

તું હવેલીમાં રહીને પણ રહ્યો છે નાનો જ ને  

હું અહીં માણસ તરીકે છું, મિનારા જેમ છું

 

જિંદગી મારી ઘડી મારા જ સંવિધાનથી

આઇનામાં,શબ્દમાં હું વ્યક્ત મારા જેમ છું

 

આજની આબોહવામાં મુક્ત ફેલાઈશ હું

રોકવા વિચાર ના, વિચારધારા જેમ છું