હું લખું છું

કોઈ લખતું ભાવિની અટકળ વિશે,

હું લખું છું આજની આ પળ વિશે.

કોઈ લખતું ફૂલ ને ઝાકળ વિશે,

હું લખું છું શૂળ ને બાવળ વિશે.

કોઈ લખતું અન્નકૂટ શ્રીફળ વિશે,

હું લખું છું ભૂખના પરિબળ વિશે.

કોઈ લખતું સ્તન અને સાથળ વિશે ,

હું લખું છું ધાવણ ને અશ્રુજળ વિશે.

કોઈ લખતું વિરહની પળપળ વિશે,

હું લખું છું ભૂખની ટળવળ વિશે.

કોઈ લખતું આભ ને વાદળ વિશે,

હું લખું ભૂકંપ ને ખળભળ વિશે.

કોઈ લખતું પ્રેમના કાગળ વિશે,

હું લખું છું રોટલી ને ખળ વિશે.